U PALAZZU DI I GUVERNADORI

Hè issa torra, a bastia, à avè datu u so nome à a cità. Era innalzata in un locu propriu strategicu, nantu à una tozza supranendu a cala di Portu Cardu (u Vechju Portu di Bastia), è prestu prestu mutò di forma, diventò un castellu, vene à dì una struttura difensiva di più maiò chè una simplice torra di guardia. Ci vulerà à aspettà a fine di u XVu seculu per ch’ellu diventessi u castellu a residenza permanente di i guvernadori di Genuva, puru s’ella hè ritenuta segondu a tradizione a data di u 1453, cum’è data di stallazione.