E VILLE DI PETRABUGNU

I paisoli di Guaitella è di L’Alzetu cù e so case medievale sò affaccatoghji assignalati chì ci si pò scopre l’isule di l’arcipelagu tuscanu. Ùn hè chè un esempiu di u patrimoniu campagnolu ch’ellu palesa issu paese balcone propriu tipicu. Puru s’elli si sò sviluppati assai i paisoli muntagnoli, i so « centri storichi » anu mantenutu a so identità, ne testimunieghjanu l’antiche case appicciate una à l’altra furmendu paesi chì ci si stà bè. I puderete scopre issi paesi segondu e passighjate ch’è vo sceglierete di fà per i chjassi di rundighjata chì tessenu a leia storica trà mare è monti. Partendu da u portu di piacere di Toga, a vitrina marittima di a cumuna, i chjassi indittati avvianu l’appassiunati di attività di natura ver’di e tozze finu à l’anziane nivere di Cardu chì sò u culmine di’ssa passighjata.

I percorsi pedunaghji numerosi sò dinù a ricchezza di a cumuna, tempi fà permettianu di andà da un paisolu à l’altru. A municipalità hà fattu a scumessa di rinnuvà issi chjassi chì serpighjeghjanu à meza machja longu à affiuramenti scugliosi.

Issi percorsi storichi, labellizati « chjassi di u patrimoniu », francanu parechji paisoli chì l’alivi è i castagni adombranu. Quelli chì venenu à frustà i so scarpi per issi « chjassi di a memoria » ùn staranu tantu à fà un’arretta culturale è puderanu apre e porte di e cappelle è di l’altri edifizii religiosi chì di’ssi paisoli ne sò l’adorni. A chjesa maestosa di Santa Lucia, di suchju baroccu, supraneghja a costa orientale di u Capicorsu è asconde pitture di maestri preziose è riliquarii di l’epica muderna. Ogni annu, di dicembre, issa chjesa di prupurzione nobile accoglie i numerosi pelegrini di u circondu ghjunti à celebrà a festa patrunale ingiru à e riliquie di a santa purtate in prucessione per a strada chì supraneghja u mare Tirrenu.