FURIANI

Issu anticu feudu signurile, chì cunserva a stampa di u so passatu riccu, supraneghja u stagnu di Chjurlinu nantu à u litturale orientale. Innalzata sopra à un spronu in core di u paese, una torra quadrata impunente hè l’ultima vistiga di l’anticu castellu di Furiani.

Prutette da issa vechja furtezza genuvese, e so case vechje cù e so facciate alte si alzanu intrepide. Isse abitazione tradiziunale di a Corsica campagnola, terrazzate nantu à e culline, danu à u retrurughjone bastiacciu u so carattere specificu. Vi basterà una passighjata per isse strette chjappellate serpighjendu trà i lavatoghji, e funtane è i forni da accorghje vi ch’è vo site ciuttati in a storia. Hè propriu in cima di u paese ch’ella paleserà a cumuna u so ghjuvellu più bellu. Dopu una oretta di attippera, truvarete appena scantata da chì nimu a pudessi infastidì, a cappella di Santa Maria Assunta. Issa antica chjesa rumanica, innalzata à u IXu seculu nantu à un pianottulu, pare ch’ella hè stata dinù un rimitoriu. Nantu à issa tozza ch’elli prezzanu quelli chì venenu à marchjà, omu si avvede subbitu chì u tempu ùn hà mutatu a sputichezza di u locu, è da scopre un altru aspettu di a cumuna ci puderete vede una bella scuperta.

In piaghja, hà sappiutu apprufittà a cumuna di l’esudu rurale di u seculu scorsu per piglià u so abbriu ecunomicu cù l’arrughjunera di cummerci numerosi è dinamichi. A brasseria Pietra, prima brasseria di a storia di a Corsica, hè aperta dapoi u 1996 in a piaghja di Furiani. Pruduce e so biere rinumate fatte cù a farina castagnina è cù l’arbigliule di a machja.

À dui passi di a cumuna, hè un’altra infrastruttura à dà li a so nomina à Furiani : u stadiu Armand-Cesari, cunnisciutu anzituttu per via di a strage di u 5 di maghju di u 1992, accoglie u Sporting Club di Bastia. Hè un seculu ch’ella hè accesa è ch’ella brusgia a « passione turchina ».