SANTA MARIA DI LOTA

Spargugliatu per a machja muscosa è i boschi di castagni chì si ne collanu finu à a dursale di u Capicorsu, si pò scopre issu paese balcone cù e so strette chjappellate è i so andati chì cunducenu à chì vene à passighjà ci finu à u Cimone, una sarra propriu stupente di u rughjone bastiacciu, alta 1198 metri. Nantu à issa cima chì scumparte u Mediterraniu in dui, u mare Tirrenu da una banda è da l’altra u golfu di San Fiurenzu, si pò gode una vista panoramica bellissima. Issi chjassi pasturigni praticati per l’impiaghjere è e muntagnere sò e vistighe di una tradizione agrupasturale accaliata si à pocu à pocu dapoi u principiu di u seculu scorsu, puru s’elli fermanu nascosti, i passi di l’appassiunati di a muntagna i facenu sempre campà.

L’amatori di storia faranu di sicura un’arretta in Mandriale da rimirà l’anticu ponte genuvese in spinu à cavallu custruitu à u XVIIu seculu, hè un simbulu di l’impronta ch’ella hà lasciatu a presenza ligure in a cumuna.

Si pò vantà Santa Maria di Lota di pussede un riccu patrimoniu architetturale :  da a chjesa di Santa Maria Assunta, cunsacrata à a Vergine, à quella di Santu Antone di Paduva, i so oratorii è e so cappelle numerosi, u cunventu dumenicanu di San Ghjacintu. Pare ch’ellu sia u paese un veru santuariu religiosu. Innalzate in issu paisaghju à valle, si puderanu scorge faciule e « Case di l’Americani ». Cù a so architettura ispirata da u stile tuscanu, issi casoni rettangulari incù culunnate, portachi è giardini, vantanu a riescita di i Capicursini partuti à circà furtuna per u Novu Mondu à a fine di u XIXu seculu.

In Figarella, issi bellissimi casoni supraneghjanu a marina di Miomu, una stazione balnearia belluccia è prezzata à l’entrata nordu di Bastia. Di accessu faciule, a so marina di cotule dilettosa dà u laziu di ciuttà si in mare apprufittendu di una stonda di scialu in famiglia, sottu à u sguardu di i guardiamare è di a so famosa torra genuvese innalzata à u XVIu seculu, rinnuvata pocu fà.