MARINE

Luntanu da u rimusciu di e marine turistiche assai di l’isula, vi rigala u litturale di u Circondu Bastiacciu un ambiu prutettu : golfi, cale scantate, marine bellissime, calelle di cotule è di scogli o di rena bianca bagnati da l’acque di un mare chjampidu, puntighjeghjanu u litturale. … ogni marina vi paleserà a so bellezza, i so culori, a so sputichezza, tuccherà à voi à sceglie.

Da Bastia, à u Capicorsu passendu per u desertu di l’Agriate, si stende u Circondu Bastiacciu  longu à 150 chilometri di litturale, ci si trova u parcu naturale marinu di u Capicorsu, u più stesu di Francia metrupulitana : 85 delfini maiò identificati, 236 spezie di acelli, parechji ettari di atolli curallini, pesci spada, aligoste è lupacante à buzeffa… un veru ghjuvellucciu naturale à e porte di Bastia.

In Capicorsu, chì u so cugnome hè « l’isula inde l’isula », ci truvarete e marine più belle di a regione : isse marine, di rena o di cotule, puntighjeghjanu u litturale curatu da torre genuvese. Ci puderete ghjunghje faciule seguitendu chjassi à meza machja, isse marine sò veri paradisucci per quelli bramosi di ciuttata o per quelli chì preferiscenu stà si ne à l’oziu. Cum’è e cale piattate da i scogli, e marine mudellanu i paisaghji di u levante è di a punta di u Capicorsu, apprufittarete di a calma chì ùn si trova più per i lochi frequentati assai.

Ascose in core di u desertu di l’Agriate, trà a  Conca di Oru è a Balagna, sculinarete dopu unipochi di sforzi marine smense è bellissime. Quelli avvezzi à marchjà ci ghjunghjeranu seguitendu l’andatu di i duganeri, per quelli di più aventurosi ci puderanu andà cù 4×4 è l’altri chì preferiscenu apprufittà di una passighjata piacevule puderanu cullà nantu à i picculi battelli chì partenu da u portu di San Fiurenzu è facenu u passa è vene.

À u meziornu di Bastia, per u curdone lagunariu vederete stese di rena ampie, nantu à unepoche sò stabiliti base è centri di attività nautiche chì sò i più dinamichi di l’isula : vela, ciuttata, schì di mare, mottò di acqua, caiaccu di mare, paddle… Quelli appassiunati di attività fisiche ci truveranu un spaziu di ghjocu predilettu è mentre u tempu di una ghjurnata in famiglia o cù l’amichi, à chì a si scialerà, à chì si arripuserà.

Truvarete marine propriu piacente vicinu à Bastia, di accessu faciule andendu ci à pedi o cù u carru, permetteranu à quelli chì ùn anu vittura di pudè scialà si la à u mare.