Parcu di ghjochi da zitelli
Postu ch'elle sò e vacanze l'uccasione di ritruvà si in famiglia è di offre à i vostri figlioli è figliulini stonde di risa, di piacè è di svagu, hà selezziunatu per voi l'uffiziu di u turisimu dui parchi di passatempu à qualchì chilometru solu à u sudu di Bastia.
Ch’è vo siate in vacanze inde u circondu bastiacciu o ch’è vo ricevissite i vostri figliulini per qualchì ghjornu, pensate à diversificà e so attività è à offre li una surtita in famiglia riesciuta inde un parcu di ghjocu.
Offrenu sti “picculi tempii” di u divertimentu un terrenu di ghjocu ideale per i zitelli è permettenu di prufittà di stonde di risa, di svagu è di dillinata in famiglia. Percorsu di avventura, ghjochi di acqua, girelli… à l’apertu o cuperti, offrenu i parchi di passatempu un pannellu largu di attività per a felicità di i chjuchi è u piacè di i maiò
Preferiscenu i vostri figlioli passà u tempu à fà a sculiscia ? Ùn ci hè penseru : sò fatti per elli e sculisciole è i ghjochi gunfiatoghji. Li piace à saltà inde tutti i sensi ? Li permetteranu i tundelli è i trampulini di piglià si da veru per qualchì cangurù. Altri preferiscenu ciambuttà inde l’acqua per prutege si da u caldu di a bella stagione ? Sò fatti à posta e piscine è i ghjochi acquatichi.
À l’apertu, i pedi inde l’acqua o à l’indentru, cumponenu l’animazione pruposte una sosula di prima trinca da permette à i zitelli di sfugà si, di appichjà si, di sculiscià in securità. Una stonda di dillinata per i parenti chì ponu sparte dinù un mumentu di ghjocu è di cumplicità cù i so figlioli… è perchè micca, u tempu di una ghjurnata, di turnà zitelli una cria.