PRUDUTTI CORSI
Cù a so robba savurita è i so pruduttori lucali, hè rinumatu u Circondu Bastiacciu per a qualità di i so prudutti chì spechjanu sta Corsica rurale è i so sapè fà. Un percorsu di prima trinca per scopre i savori di l'isula è scambià cù omi è donne chì anu fattu di a qualità a so parolla maestra.
Ch’ella sia in Bastia o in i paesi vicini, tene à l’appiattu u Circondu Bastiacciu una robba varia fatta à prudutti sputichi da scopre in e butteghe è in e spezierie seguitendu un percorsu à mezu andà trà l’artisgianatu è a creazione. Lochi di vita è di scambii, facenu scopre i prudutti di a Corsica è di u rughjone mettendu à l’onore i so pruduttori lucali
Cuncepita in i paesi in giru à Bastia, dà a so salameria di muntagna affumicata cù e legne di castagnu una mansa di prudutti rinumati : a coppa, u lonzu, u prisuttu, u figatellu è a salciccia, fatti tutti da l’artisgiani lucali chì facenu campà i paesi di l’internu
Si trovanu nantu à i mercati tradiziunali i legumi è i frutti biulogichi, i casgi capruni o pecurini chì portanu a stampa di sta terra è chì si ponu scopre inde un ambiu calurosu è propiu mediterraniu
S’incontranu cun piacè i residenti è i turisti per l’andati di sti mercati per tastà un piattu di salameria in giru à una biera di u rughjone o per tuccà un bichjeru di vinu è fà a spesa, discutendu cù i pruduttori.
Hè inde u listessu spiritu di spartera è di cunvivialità ch’ella mette in leia a Strada di i Sensi 68 pruduttori è artisgiani incù i so sapè fà di prima trinca, trà u Capicorsu è u Nebbiu. Da fà vi vede cum’elli travaglianu, vi aprenu e so porte l’agricultori, l’allevadori, l’apicultori, i brassori, i castaneicultori, i vignaghjoli è l’urtulani. Cù una parolla maestra : fà ch’ellu sia l’incontru in core à a so dimarchja di artisgiani da pudè sparte, al di là di i so prudutti, u so amore di a Corsica.